أمينة خليل عن وجود تشابه بين “وش في وش” و”الهرشة السابعة”: “معالجة الموضوع مختلفة”

08:56 م


الخميس 15 يونيو 2023

كتب- مصراوي:

تحدثت الفنانة أمينة خليل عن فيلمها الجديد بعنوان “وش في وش” وعن قصته.

وقالت خلال لقائها ببرنامج ET بالعربي: “أنا عامة بحس إن الحاجات اللي شبهنا وشبه بيوتنا بتبقى قريبة جدا من القلب فبتشد ليها على طول، حسيت إن فيه ناس كتير قوي ممكن يكونوا مروا بمواقف مشابهة شبه رسالة الفيلم .. حتى لو المواقف مش هي هي بالظبط بس بنتكلم بنفس الروح دي أكتر حاجة شدتني ليه”.

وأضافت موضحة الفرق بين أحداث وقصة الفيلم ومسلسل “الهرشة السابعة”: “فيه فرق بين شخصية نادين في الهرشة السابعة وشخصيتي في الفيلم لأن الوقت في الفيلم ضيق شوية ومفيش تفاصيل كتير مش زي لما يكون فيه 15 حلقة تعيشي معاهم، هنا الموضوع صوته مختلف بس آه بيحقق نفس الحاجة وبيتكلم بلغة إحنا كلنا نقدر نفهمها وبيتكلم عن اتنين متجوزين عندهم مشاكل، لكن ده متعالج بشكل وده متعالج بشكل تاني خالص والفيلم كمان فيه كوميديا كتير عن الهرشة لأنه كان دراما جد”.

جدير بالذكر أن أمينة خليل انتهت من تصوير فيلم “وش في وش” ومن المقرر عرضه قريبا.

وتدور أحداث الفيلم في إطار اجتماعي كوميدي لايت، داخل شقة زوجية يجتمع بالصدفة فيها عائلتي الزوج والزوجة مختلفي الثقافة، وتحدث بينهما العديد من المشكلات، ونرى خلالها ما يحدث داخل الشقة في ليلة واحدة.

الفيلم بطولة محمد ممدوح، أمينة خليل، أحمد خالد صالح، محمد شاهين، خالد كمال، بيومي فؤاد، أنوشكا، أسماء جلال، محمود الليثي، سامي مغاوري، دنيا سامي، وسلوى محمد علي، وإخراج وليد الحلفاوي.