مدحت العدل عن تحضيرات مسرحية “تشارلي”: “اتفرجت على 53 فيلم في 4 أيام”
02:00 ص
الجمعة 28 يوليه 2023
كتب- مروان الطيب:
حل فريق العرض المسرحي “تشارلي” بطولة الفنان محمد فهيم ضيوفاً على برنامج “معكم” تقديم المذيعة منى الشاذلي ويعرض على قناة “CBC”.
ومن ضمن فريق العمل الذي تواجد في الحلقة السيناريست الكبير مدحت العدل، والذي أشرف على كتابة المسرحية وتحدث عن بداية تكوين فكرة العرض المسرحي، كما تحدث عن النجاح الكبير للعرض سواء بمصر أو بالمملكة العربية السعودية.
وتابع مدحت العدل “لقيت محمد فهيم جايلي ومعاه تورت وحاجات لطيفة كده ولقيتهم بيقولوا لي عاوزين نعمل تشارلي تشابلن ميوزيكال بطولة فهيم قولت آه شباب لذيذ متحمس وقولت لهم ماشي نعمل مسرحية فيها أغاني يعني قالولي لأ المسرحية كلها ميوزيكال”.
واستكمل “وابتدوا يحكوا والحقيقة أنا بعلم حاجة جديدة كده في السكريبت للطلبة اذا ماكنتش مهووس بالفكرة مش هتعرف تخلي غيرك مهووس بيها يعني انت عايش واكل نايم بالفكرة عشان تقنعني كمنتج عشان أدفع ملايين لازم تبقي مهووس بالفكرة والحقيقة هوسهم بالفكرة اتنقل لي”.
مضيفاً “وهم جولي ككاتب مش كمنتج وكنت مدرك وقتها إن المسرحية مش هتحصل وإن مسرحية ميوزيكال في العالم العربي مش هتلاقي نجاح في مصر ولا العالم العربي عشان مش ذوقنا وسابوني ومشي وأنا كان عندي حالة اسمها شابلينزم ودي ظاهرة حصلت سنة 1929 أن العالم كله بقي يقلد تشارلي تشابلن”.
وانهى حديثه قائلاً “وكانوا جايبين لي أفلامه على فلاشات وفي 4 أيام كنت شايف 53 فيلم”.
كما كان للفنان محمد فهيم رداً على حديث مدحت العدل قائلاً “لما سخن للفكرة قالنا طب ايه رأيكم بقي محدش هيكتبها غيري ويالا بقي عشان أقعد اشتغل”.
وعرضت مسرحية “تشارلي” لأول مرة في السعودية ضمن فعاليات موسم الرياض على مسرح محمد العلي وهي عبارة عن مسرحية غنائية استعراضية عن حياة أسطورة السينما “تشارلي شابلن”، كتابة مدحت العدل، استعراضات عمرو باتريك، ألحان إيهاب عبدالواحد، موسيقى نادر حمدي، ديكور حازم شبل، ملابس ريم العدل، وإخراج أحمد شوقي البوهي.