03:00 ص
الأحد 06 أغسطس 2023
كتب- مروان الطيب:
حل الفنان بيومي فؤاد ضيفاً على برنامج “ET بالعربي” وتحدث “بيومي” عن تصريحاته خلال الفترة الماضية حول قبوله العديد من الأدوار وأن السبب وراء انتشاره خلال السنوات الماضية هو الخجل وعدم رفضه للعديد منها وهو الامر الذي يسبب له العديد من المواقف المحرجة سواء في حياته المهنية أو الشخصية.
وتحدث بيومي علاقته بنجوم الوسط الفني :”ممكن اشتغل مع فنان في أكثر من عمل ونكون صحاب بس مش معايا رقمه لأني مش بطلبه بسبب الخجل والناس بيستغربوا جداً لما يطلبوا مني رقم كريم عبد العزيز وأقول لهم مش معايا وكريم شخص قد ايه لطيف وجدع وابن بلد ولو كريم كتر خيره اداني الرقم هبقي فرحان وطاير من الفرحة”.
أما عن مطالبة العديد من المنتجين ونجوم الوسط الفني برفع أجره قال “فيه ناس بيفتكروا أني بشارك في أعمال كتير من أجل الفلوس ولكن ده مش حقيقي لدرجة المنتجين نفسهم بيطلبوا مني أعلي أجري تقريباً لأني صعبت عليهم، وناس كتير يستغربوا من أرقامي وأجري لحد دلوقتي وبفكر أرفع أجري الفترة المقبلة”.
مضيفاً “التمثيل يكسر الخجل أمام الكاميرا والجمهور في المسرح ولكنه مش بيغير الشخصية وأحياناً ممكن لما شخص يضغط عليا أشارك في عمل وأنا تعبان ومش فاضي لكن مبعرفش أرفض بسبب خجلي”.
يذكر أن بيومي فؤاد ينتظر عرض أحدث أعماله السينمائية هذا العام وهو فيلم الكوميديا “مندوب مبيعات” والمقرر مشاركته ضمن أفلام موسم الصيف يوم 17 أغسطس الجاري.