12:06 م
الجمعة 05 يناير 2024
وجه مؤدي المهرجانات حمو بيكا، رسالة لمتابعيه عبر السوشيال ميديا، مؤكدا في مضمونها “استثمر في سمعتك وسيرتك”.
وكتب بيكا، عبر حسابه على إنستجرام: “هتمشي وتسيب كل حاجة.. وكل حاجاتك هتتورث وتروح لغيرك، كل حاجة بتاعتك هتبقى بتاعت غيرك إلا سمعتك وأثرك”.
وتابع: “فلو هتتعب وتشقى علشان تسيب حاجة نضيفة ومش ملطوطة.. احرص تبقى سمعتك.. استثمر في سمعتك و سيرتك”.
وأضاف: “محدش هيقول غير كان كويس /طيب/ جدع/ خدوم/ حنين او ابن … وأنت عارف الباقي.. خرجنا منها على خير وبسمعة طيبة وأثر طيب يا رب..أول جمعة في ٢٠٢٤ جمعة مباركة على كل أهلي وأصحابي”.
وفي مداخلة هاتفية مع برنامج “90 دقيقة” تحدث مغني المهرجانات حمو بيكا عن مقطع الفيديو الشهير الذي طالب من خلاله أقاربه بعدم التواصل مع والدته وألا يطلب منها أحد مساعدة مالية.
وقال بيكا: “أنا طلعت من منطقة شعبية وكنت أنا وأسرتي عايشين في أوضة بصالة وحمام، وكنا راضيين بعيشتنا .. كل وقت وكل آدان كنت بقول يارب اديني وعمري مابصيت لحاجة مش بتاعتي ولا طلبت من حد مساعدة، واشتغلت وشقيت وتعبت كتير، ومكنتش بعمل حاجة وكنت بدور على شغل كتير”.
وعن سبب ظهوره في فيديو يطلب فيه من أقاربه عدم طلب مساعدة مالية من والدته، تابع: “بعد سبوع بنتي لقيت الناس كلها بتتصل بيا وتقولي إحنا محتاجين، ولو قلت مش معايا كانوا يقولوا إزاي مش معاك ومراتك لابسة دهب، كل واحد حر، أنا تعبت نفسيا والناس بتطلب ببجاحة”.
واستكمل: “لو قرايبي طلبوا عيني هديهم، بس الناس اللي بيطلبوا معاهم فلوس، أنا راجل شقيت عشان أوصل للي أنا فيه، أنا أبويا خلاني راجل وأنا اللي شايل بيت أبويا وبيت إخواتي”.
وأوضح، أنه عمل بمحل كشري و”مبيض محارة” و”فني سيراميك” وغيرها من المهن البسيطة حتى لا يطلب مساعدة من أحد
وأضاف: “إحنا مبناموش علينا ديون والتزامات، لو جالي شوية برد أنا هقعد في البيت، أنا قرايبي زعلوا مني بس أنا كنت أقصد الناس اللي مش محتاجين وبيطلبوا، أنا بعمل خير بس ده بيني وبين ربنا ومش لازم أطلع أقول”.