خالد الفايد: يحشر المرء مع من أحب وأنا بحب أبو وديع.. والجمهور يعلق

08:17 م


الخميس 17 أغسطس 2023

كتبت- شهد القاضي:
أثار المغني الشاب خالد الفايد جدلا واسعا، بسبب صورة له، ظهر بها وهو يرتدي “تيشيرت”، مطبوعا عليه صورة الفنان الكبير جورج وسوف.
ونشر الصورة عبر صفحته بموقع التواصل الاجتماعي “فيسبوك”، وعلق على الصورة: “يحشر المرء مع من أحب وأنا بحب سلطان الطرب أبو وديع”.
وجاءت تعليقات الجمهور، على المنشور: “متقلقش يا أخ خالد ربنا يتقبل منك وتحشر معاه إن شاء الله المهم تكون مبسوط بس”، “هو إنت يا خالد طبيعي ومستوعب الكلام اللي بتقوله؟ والدتك مش بتراجعك في الكلام اللي بتقوله ده؟”، “الناس بتقول اللهم أحسن ختامنا”، “إنت فعلا مغيب”، “ربنا يهديك ويصلح حالك يا رب”، “الناس تحب تحشر مع النبي والصحابة”، “والله إنت جننتنا معاك”، “إنت فاهم إنت بتقول إيه؟”.
كان خالد الفايد أعلن تراجعه عن اعتزال الغناء من خلال صورة قديمة مع المنتج هاني محروس وقام خلالها بالاعتذار له عما بدر منه خلال الفترة الماضية، قائلاً: “أكبر غلطة عملتها في حياتي إني سمعت كلام الناس، كنت مخلص من قلبي لكن شفت منهم عكس كدا، وربنا يكفيكم شر اللعب في الودن والكلام الفارغ، ربنا يبعد عنكم أي حد بيستغلكم ويضحك عليكم باسم الدين، ربنا يبعد عنكم أي حد عامل فيها مولانا وهو .. صدقوني فيه حاجات مش هقدر أشرحها لكم”.
واستكمل: “ومش هقدر أقول غير إني اتسرعت وغلطت في هاني محروس غلط كبير، بسبب إني اديت ودني للناس وسيبتهم يتكلموا ويولعوا براحتهم، اوعى تسلم ودنك لحد وتخليه يبخ فيها سموم، ده درس اتعلمته حبيت أوضحه علشان محدش يقع في نفس غلطتي”.
كما قام “خالد” بنشر فيديو نفى خلاله سرقة حسابه قائلاً: “أنا خالد الفايد وحسابي مش مسروق ومن حق أي واحد في الدنيا يعمل الحاجة اللي بيحبها ومن حقه ينام ويقوم مرتاح نفسياً مش واكل حق حد، مش مضايق حد، كل واحد من حقه يعمل اللي هو عايزه طالما ما بيأذيش حد، ليه المغالاة وليه الواحد يكبت على نفسه وليه الواحد يضيق على نفسه جامد خليها على الله”.
ووجه نصيحة لمتابعيه قائلاً: “مش عيب انك تعتذر اعتذر أما تحس بالحزن انك كنت السبب في ألم شخص من دون ما تقصد، اعتذر أما تحس بالضيقة إنك أهملت شخص كان يستاهل اهتمامك، اعتذر أما تحس بالندم انك خسرت عاطفة شخص ما ناحيتك بسبب حاجة غلط انت عملتها، الاعتذار علاج، الاعتذار بس هو اللي قادر يصلح كل ده وأكتر.. اعتذار بدون أعذار”.
وكان المنتج هاني محروس، أعلن في نوفمبر 2022، تعاقده مع المطرب خالد الفايد، على تقديم ألبوما يضم 8 أغاني، وطرح منها أغنية بعنوان “أنا حد جديد” وفي فبراير 2023، أعلن المطرب خالد الفايد، اعتزاله الغناء، وظهر باللحية ومرتديا الجلباب.