زينب عزيز ترد على طارق الشناوي: “عايز تهاجم مصطفى قمر هاجمه بعيد عن أولاد حريم كريم”

09:45 م


الخميس 07 سبتمبر 2023

كتب- مروان الطيب:

نجاح كبير يحققه فيلم “أولاد حريم كريم” والذي يعرض حاليًا ضمن موسم أفلام الصيف لهذا العام وسط مشاركة نخبة من نجوم السينما المصرية.

ويلقى الفيلم استحسان من عدد كبير من الجمهور والنقاد وصناع السينما الذين أشادوا بالفيلم واعتبروه عودة قوية للسيناريست زينب عزيز والمخرج علي إدريس.

وعبرت السيناريست زينب عزيز عن سعادتها بنجاح فيلم “أولاد حريم كريم” وعلقت في تصريحات خاصة لـ “مصراوي” قائلة: “ردود الأفعال إيجابية وكل الناس كانت خايفة أن الجزء الثاني يبقى أقل المرة دي، لكن الحمد لله كتير من الناس شايفين أنه مش جزء تاني على قد ما هو عمل جديد، الحدوتة بتاعت الشباب وعلاقتهم وتشابك العلاقات بعيد عن فكرة الجزء الأول”.

وعن غياب بعض نجوم الجزء الأول قالت: “دراميًا مكانش ينفع شخصية جيجي تبقى موجوده يا إما هتبقى غضبانة، أو مُطلقة ولازم بعد مرور 18 سنة تبقى الحكاية مختلفة يعني احنا في حياتنا الطبيعية 18 سنة لما تعدي في عمر البني آدم الأمور بتختلف، واللي ساعدني إن شخصية زي هالة رفعت من الأول شخصية بتنفصل يعني هي قبل ما تتعرف بماجد اللي هي شخصية طلعت زكريا، كانت مطلقة وبتقوله أنا بفشل مع الرجالة فلما تشوفها مع زوج جديد وحدوتة جديدة مش لوي دراع لما شخصية كريم يبقى أرمل طبيعي جدًا في الأحداث”.

وعن مشاركة عدد من النجوم الشابة والصاعدة بأحداث الفيلم علقت: “كمان الولاد الشباب أضافوا حيوية وعلاقات، وازاي الناس دي هتدخل عن طريق الولاد بقصص راجعة من بعيد”.

أما عن رأيها في انتقادات الناقد طارق الشناوي: “معظم اللي اتكتب كان إيجابي بالنسبة إلا اللي حصل من الأستاذ طارق الشناوي بس لو قريت أستاذ طارق متكلمش عن الفيلم خالص هو كان موجه كلامه كله بشكل للأسف عدائي لشخص مصطفى قمر كان بيتكلم عليه كمطرب متكلمش عن الفيلم يعني، لم يناقش مثلًا إن حدوتة الفيلم بتدور كذا وكذا وده ضعف في السيناريو أو ضعف في الإخراج، يعني متكلمش عن نقاط ضعف في السيناريو عشان احنا نقدر نشوف هو بيقول إيه، وللأسف هو كتب إني حد في الكتابة مهم وعلى إدريس حد في الإخراج مهم ومكتبش أي حاجة عن الفيلم”.

وأنهت حديثها قائلة: “وإذا انت عايز تهاجم مصطفى قمر هاجمه بعيدًا عن الفيلم، انما ده خلى الشكل مش لطيف إن أنت الوحيد اللي قولت إنه من أسوأ الأفلام حتى مقولتش ان الفيلم فيه مناطق ضعف ومناطق إيجابية، زي النقد العادل الموضوعي إنما نفاجئ بـ “اللا فيلم” و “اللا سينما” واحنا عاملين حاجة ميتقلش عليها إنها سينما ده كتير، والهجوم كان مش لطيف وفي المقابل ناس تانية كاتب بشكل لطيف

ويعرض حاليا فيلم “أولاد حريم كريم” بالسينمات منذ أسبوع وحقق ردود فعل إيجابية وإيرادات تخطت 3 ملايين و 500 ألف جنيه.

وفيلم “أولاد حريم كريم” بطولة مصطفى قمر، داليا البحيري، بسمة، علا غانم، خالد سرحان، عمرو عبد الجليل وبشرى، بالإضافة مجموعة من النجوم الشباب منهم تيام مصطفى قمر، رنا رئيس، وهنا داود، يوسف عمر، كريم كريم، وتأليف زينب عزيز وإخراج علي إدريس، ومن إنتاج شركة انتلجنت (iproductions) وتوزيع خارجي روتانا.

وأقيم مؤخرا عرضان للفيلم بحضور كل أبطاله في القاهرة والإسكندرية بحضور عدد كبير من الإعلاميين والصحفيين وأيضا الجمهور الذي حرص على مشاهدة الفيلم مع نجومه.