11:30 م
الخميس 10 أغسطس 2023
كتب- مروان الطيب:
حل المخرج محمد جمال العدل (ماندو) ضيفاً على البرنامج الإذاعي “الراديو بيضحك” على راديو “9090”.
وتطرق “ماندو” لأحدث أعماله السينمائية هذا العام وهو فيلم “ع الزيرو”، بطولة النجم محمد رمضان والذي عرض مؤخراً بموسم أفلام الصيف ويحقق نجاحاً ملحوظاً بشباك التذاكر، كما تحدث “العدل” عن مسلسله الجديد “الراكون” بطولة الفنان يوسف الشريف في أول تعاون لهما معاً في الدراما التليفزيونية والمقرر عرضه بموسم رمضان 2024، إلى جانب فيلم “الملحد” والذي اثار جدلاً كبيراً مؤخراً وعن موعد طرحه بدور العرض السينمائي.
وقال: “هيتعرض في الشهور القريبة دي امتي بالظبط معرفش لإن كل شوية بيبقى فيه ميعاد بس المفترض أنه في خلال شهرين تلاتة بالكتير”.
وبسؤاله عن الجدل الذي أثير حول الفيلم حتى قبل عرضه تجارياً قال: “مصدره اسم الفيلم أنه بيتكلم عن نقطة شائكة زي الإلحاد وإن اللي كاتبه إبراهيم عيسى واسمه بيعمل جدل، وعنده ناس بتحبه وبتأيده وعنده ناس بتقف ضده وبتتصيد له أي مشكلة، وأنا الفيلم ده بالذات بعمله وأنا عارف ومقدر أي ردود أفعال هتحصل تجاهه، وعارف أن الفيلم صعب وأقدر أقولك بدون تواضع زائف إن ده يبقى أجرأ فيلم عربي حصل من 100 سنة”.
وأضاف “فيلم صعب جداً فيلم حساس بيتكلم في حاجة في منتهى الحساسية ومفيش كلام بين السطور، الموضوع واضح جداً فأنا عارف إنه فيلم تقيل ومش عارف الناس هتستقبله ولا لأ، بس أنا ضميري المهني مرتاح ناحية تقديمه، وكان لازم ييجي وقت حد يناقش الموضوع ده لأن الظاهرة دي للأسف منتشرة جداً ومحدش بيناقشها”.
وعن اختياراته لنجوم فيلم “الملحد” قال: “أتمنى على المستوى الفني الناس تحب الفيلم وعلى مستوى أفكاره عارف إن هيبقي عليه كلام وناس هتبقى معاه وناس هتبقى مش معاه لكن عندي أمل إن الناس تستوعبه آجلاً أو عاجلاً”.
وبسؤاله عن كيفية الفصل بين الترويج لفكرة معينة وعن مناقشة فكرة بعينها وليه، علق قائلاً: “أكيد مش هعمل فيلم بروج فيه للإلحاد وأنا عامل فيلم عشان أقول فيه ظاهرة سلبية جداً موجودة في المجتمع وبتنتشر بشدة تعالوا نشوفها هي بتحصل ليه، تعالوا نشوف إيه أسبابها، تعالوا نناقش الراجل اللي بيعتنق الفكر العجيب ده هو معتنقه ليه، وحضرتك دلوقتي أم وابنك عاوز يروح يشوف الفيلم وهتمنعيه طب ماهو ممكن يتناقش في الموضوع ده بعيد عنك على فكرة ولو مفتحتيش المجال انك تتكلمي معاه هيعمل حاجات من وراكي سواء كويسة أو مش كويسة”.
وأنهى حديثه قائلاً: “أنا شايف إننا مندفنش راسنا في الرمل ولما ببقى فيه ظاهرة موجودة على الأرض لامسينها بين الشباب والناس بتشوفها بعينيها وانت تيجي تقف ضد الموضوع، طب بتقف ضده ليه أنت سيبني أعرض الفيلم سيبني أقول الظاهرة دي بتحصل ليه ونتناقش ونحاول نحلها”.
يُعرض لـ ماندو فيلم ع الزيرو بطولة محمد رمضان ونيللي كريم وجومانا مراد وإسلام إبراهيم، تأليف الدكتور مدحت العدل.