حلت المطربة رنا سماحة ضيفة على برنامج ساعتين رايقين مع الإذاعية خلود نادر على محطة نغم إف إم، وقالت رنا خلال الحلقة عدد من التصريحات منها :
من لزماتي هتلاقيني بقولك في نص الكلام بتهزري.. والناس بتركزلي أوي على الحته دي. وبلعب في شعري كتير.
من الأغاني اللي بحبها لعمرو دياب أوي أغنية تقدر تتكلم عن روحك.
عملت مع محمد الرفاعي أغنية أميرة الحب والأغنية كانت كلمات وألحان محمد الرفاعي واتعملت بشكل حلو أوي
اكتشفت إني بعرف أغني، لما كنت صغيرة كنت دايمًا بسمع الناس بيغنّوا في المدرسة، وحاسة إن فيه عندي حاجة بس مش متأكدة منها.
فضلت ساكتة ومخبية لغاية ما كنت في 5 ابتدائي جم قالولنا مين بيعرف يغني هنا طلعت قولتلهم أنا.
لما غنيت في المدرسة فضلت مخبية شوية على أهلي في البيت عشان مكانش عندي الجرأة لحد ما جت في يوم قرايبي كانوا معانا في المدرسة قالولهم في البيت رنا بتغني في الإذاعة المدرسية. وأنا في ثانوية عامة أهملت دراستي جدا وبقيت مركزة في المسرح والمزيكا ودخلت المعهد العالي للموسيقى العربية وبدأت الرحلة الطويلة.
ماما ساعدتني أني أطلّع موهبتي، وأنا صغيرة كنت في فرقة مزيكا بتطلع في البرامج اللي فيها مواهب الأطفال وأنا كنت من ضمن المشاركين وغنيت على القناة التالتة، والقناة الأولى، والقناة الرابعة ساعتها كنت 13 سنة.
وأنا صغيرة أم كلثوم كانت أساسي في حياتنا، وكنت بحب أنغام أوي ولسة بحبها وأصالة وشيرين عبد الوهاب وبحب وردة وفيروز. طول الوقت بحب أوي أغني لأنغام أغنية “في الركن البعيد الهادي”.
أغنية أميرة الحب أغنية بطابع تركي.. اتعملت في 3 بلاد كتابة وألحان محمد الرفاعي والموزع سوات أيدوجان في تركيا وصورنا الكليب في لبنان مع المخرج عادل سرحان.
أنا بحرص دايما أني أعمل فيديو كليب للأغاني بتاعتي، والكليبات بتكون مكلفة شويتين، بس حتى لما بيكون عندي إنتاجاتي بحاول أعمل كليبات حتى لو بأبسط الأدوات.
أنا أهلاوية بس مش متعصبة، الرياضة بالنسبة لي زي ما طلعت لقيت أهلي، مش بحب الناس المتعصبة في الرياضة عموما، والرياضة حاجة ترفيهية موجودة عشان نتبسط ونستمتع، بس الفترة اللي فاتت الناس بقوا واخدين الموضوع في حته غلط. والناس بقت بتزعل.
السوشيال ميديا بقت عامل مهم جدا دلوقتي، أي حد بيدخل يبص على أرقامك عشان يشوف أنتِ وصلتِ لفين، ولكن للأسف الشديد هي بقت مهمة رغم أن الأرقام بقت سهلة جدا.
الأرقام بشوفها كمطربة مش هي المقياس للنجاح لكن هي جزء منه والنجاح إني أبقى ماشية بسمع الأغاني بتاعتي بتتسمع.